Hashize iminsi ibihugu bimwe bituranye n’u Rwanda byigamba ko bizashoza intambara ku Rwanda ndetse bigakuraho ubuyobozi bukuru bw’igihugu.

Ubuyobozi bw’u Rwanda bwagiye butangaza ko aya magambo buyaha agaciro ariko ko inzira y’intambara atari yo ishyizwe imbere mu gushaka amahoro mu karere.

Mu muhango wo kwinjiza ba Ofisiye 624 basoje amasomo mu Ishuri Rikuru rya Gisirikare rya Gako kuri uyu wa 15 Mata 2024, Perezida Paul Kagame yatangaje ko intambara irwanwa ari uko hari ibisobanuro byayo, cyane cyane iyo umuntu yayishoje aganisha ku kurwana koko.

Ati “Hari abibwira ko umwuga w’ingabo ari ukurwana intambara gusa, ntabwo ari byo, intambara abantu bayirwana iyo byabaye ngombwa, iyo hari impamvu.”

“Iyo mpamvu ifite uko isobanurwa cyane cyane intambara zirwanwa uko twe tubyumva nk’u Rwanda ni iyo umuntu akubujije amahoro mu byawe, ndetse akagushotora aganisha muri iyo nzira y’intambara, cyangwa se akoresha intambara muri ibyo byose, ari ukukubuza uburenganzira, amahoro, kukubuza iterambere cyangwa no gusenya ibyo umaze kubaka.”

Perezida Kagame yagaragaje ko mu mateka y’u Rwanda ibyinshi mu byabujije amahoro Abanyarwanda byakozwe n’Abanyarwanda ubwabo ariko haba n’abari hanze bahembera intambara bayiganisha ku Rwanda, abandi bakabishyigikira.

Yanavuze ko mu myaka 30 ishize abari bashinzwe kurinda igihugu n’Abanyarwanda baranzwe n’ubugwari bica abaturage batari bafite intwaro.

Ati “Maze ntibizabe nk’ibyo ejobundi navugaga, ntabwo dushaka kuzongera kubibona. Ntibikabeho mu Rwanda twubaka, hari amateka twanyuzemo muzi kandi mwese murayazi aho abantu bapfuye bicwa n’abandi, bicwa na politike mbi yaba iyahemberewe hano mu gihugu cyangwa se ibyaturutse hanze aho umuntu yabazwaga guhitamo urupfu ari bupfe, ahantu abantu bafite intwaro baba Abanyarwanda, baba abanyamahanga babaza udafite intwaro, bakabaza umwana, umukecuru, umusaza, ndetse n’abasore n’inkumbi benshi bakababaza icyo bahitamo kugira ngo abe ari cyo kibica.”

Yakomeje ati “Igihugu iyo cyageze aho, kugira ngo kizongere kubona ibintu nk’ibyo byaba ari ishyano. Ntabwo izi ngabo z’igihugu z’umwuga ibyo zigishwa, ibyo zitozwa amateka yacu, ntabwo yatwemerera ko byazongera kuba mu gihugu cyacu. Ni zo nshingano mufite nk’ingabo z’igihugu ari mwebwe, ari abo musanze ari n’abandi bazaza.”

Perezida Kagame kandi yasabye abasirikare bari mu ngabo z’u Rwanda kugira umutima wo kutihanganira abashaka kubagaraguza agati.

Ati “Ni cyo gikwiriye kubaranga mwebwe n’abandi Banyarwanda. Kwanga ubagaraguza agati cyangwa agatoki, mukabyanga mukabirwanya. Urupfu rero Abanyarwanda bakwiye guhitamo gupfa, ni ugupfa bahangana n’ubazanaho urwo rupfu. Mbisubiramo kenshi ariko ni umuco dukwiriye kugira.”

Umukuru w’Igihugu yibukije ba ofisiye binjiye mu Ngabo z’u Rwanda ko imwe mu nshingano nkuru z’ubuyobozi bw’igihugu n’ingabo z’u Rwanda ari ukubaka no kurinda ibyo igihugu kimaze kugeraho.

Ba ofisiye bahawe ipeti rya sous lieutenant basoje amasomo mu cyiciro cya 11 mu Ishuri Rikuru rya Gisirikare rya Gako barimo abagore 51.

Perezida Paul Kagame ubwo yari ageze mu Ishuri Rikuru rya Gisirikare rya Gako

Perezida Kagame yabanje kwerekwa abasirikare barangije amasomo yabo

Perezida Kagame yabanje kwerekwa abasirikare bari bukore akarasisi

Perezida Kagame yahaye icyubahiro Ibendera ry’Igihugu

Perezida Kagame arikumwe n’Umugaba Mukuru w’Ingabo z’u Rwanda, Gen Mubarakh Muganga n’Umuyobozi w’Ishuri Rikuru rya Gisirikare rya Gako, Brig Gen Franco Rutagengwa

Perezida Kagame arikumwe n’Umugaba Mukuru w’Ingabo z’u Rwanda, Gen Mubarakh Muganga

Perezida Kagame yafatanye ifoto y’urwibutso n’aba basirikare

Uyu muhango witabiriwe n’abasirikare bakuru mu Ngabo z’u Rwanda

Ubwitange n’umurava ni kimwe mu biranga abasirikare b’u Rwanda

Aba basirikare binjiye mu cyiciro cy’abofisiye mu Ngabo z’u Rwanda

Muri uyu muhango hifashishwa Ibendera ry’u Rwanda n’irya RDF

Iyo aba basirikare bashya binjira mu ngabo z’u Rwanda babanza gukora indahiro

Abakobwa bahawe rugari mu Ngabo z’u Rwanda

Igisirikare ni umwuga utagiheza n’abana b’abakobwa

Aba basore barangije amasomo ya gisirikare basabwe kutemera kugaraguzwa agati

Ingabo z’u Rwanda zikora akarasisi ziba zambaye impuzankano z’ubwoko butandukanye

Abanyeshuri barangije amasomo ya gisirikare baba bagomba kwiyerekana mu karasisi

Akarasisi k’Ingabo z’u Rwanda ni kimwe mu biryoshya ibi birori

Ni umuhango waranzwe n’imyiyerekano ya gisirikare

Abasirikare b'u Rwanda basabwe guhorana umutima wo kwanga agasuzuguro

Byari ibyishimo kuri aba basirikare bashya n’ababyeyi babo bari bagiye kubashyigikira

Byari ibyishimo kuri aba basore binjiye mu Ngabo z’u Rwanda n’ababyeyi babo

Imiryango iba yagiye gushyigikira abana bayo binjiye mu gisirikare

Umuhango ukirangira benshi muri aba basirikare birutse bajya gusuhuza abagize imiryango yabo

Aba basirikare bagize umwanya wo kwishima nyuma yo kurangiza amasomo yabo

Urukumbuzi rwari rwose kuri aba basirikare n’ababyeyi babo

Ababyeyi bafatanyije n’aba bana babo binjiye mu gisirikare gucinya akadiho

Bamwe muri aba basirikare bakirijwe indabo n’imiryango yabo

Amafoto: Nezerwa Salomon