Ni igitaramo cyabaye kuri uyu wa Gatanu tariki ya 12 Kanama 2022 kibera mu Murenge wa Rwinkwavu kuri stade ya Rwinkwavu.

Butera Knowless yari yatumiwe mu gitaramo nyuma y’aho muri uyu Murenge hatashywe ku mugaragaro inzu yuzuye itwaye miliyoni 750 yiswe urugo rw’umukobwa yitezweho guteza imbere umwana w’umukobwa aho azahigishirizwa ubumenyi bujyanye n’ubuzima bw’imyororokere, kugarurira icyizere umukobwa n’ibindi byinshi.

Hazigirwamo kandi ubudozi, ikoranabuhanga, ubukorikori, ikoranabuhanga, gufasha urubyiruko rufite impano kuzikuza n’ibindi byinshi bitandukanye.

Butera Knowless yakiranwe ubwuzu n’abaturage b’i Rwinkwavu baririmbana indirimbo ze zitandukanye mu minota irenga 30 yamaze ku rubyiniro aririmbana nabo.

Uwitwa Mukamusoni Théodette yafashwe n’amarangamutima avuga ko ari ubwa mbere amubonye.

Ati “ Ni ubwa mbere mubonye nsanzwe mukunda, mufana ariko sinarinzi ko rimwe nzamubona hano i Rwinkwavu amaso ku maso.”

Gatare Emmanuel we yagize ati “ Kubona abahanzi nk’aba bakomeye biradushimisha bikanatuma abana bafite impano inaha babona ko bashyizemo imbaraga nabo bazagera nka hariya ageze, ikindi binatuma ababyeyi bashobora kureka abana babo bakabona ko impano yatunga umuntu.”

Iki gitaramo cyahuriranye no gutaha inzu nshya izajya ifasha mu kwita ku bana b'abakobwa

Knowless yanyuzagamo akabyina...

Kuri Stade ya Rwinkwavu abaturage bari bitabiriye iki gitaramo

Hari bamwe mu baturage bari bamubonye bwa mbere imbonankubone

Knowless yagaragarijwe urukundo n'abanya Kayonza banyuzwe n'ibihangano bye

Byari ibyishimo kuri benshi bari babonye Knowless bwa mbere