00:00:00 IGIHE NETWORK KN KINYARWANDA EN ENGLISH FR FRANCAIS

Amakosa Amerika yakoze mu gusabira Rusesabagina kurekurwa

Yanditswe na IGIHE
Kuya 15 Kanama 2022 saa 11:06
Yasuwe :

Icyumweru kigiye gushira Umunyamabanga wa Leta Zunze Ubumwe za Amerika ushinzwe Ububanyi n’Amahanga, Antony Blinken asuye u Rwanda, mu byamugenzaga hakaba harimo n’ifungwa rya Paul Rusesabagina.

Rusesabagina yakatiwe n’inkiko z’u Rwanda gufungwa imyaka 25, nyuma yo guhamywa ibyaha by’iterabwoba birimo ubwicanyi bwakozwe n’Umutwe yari ayoboye wa MRCD-FLN. Yafatiwe i Kigali muri Kanama 2020, nyuma yo kubwirwa ko agiye i Burundi, akisanga mu Rwanda.

Rusesabagina wavukiye i Murama ya Gitarama ku wa 15 Kamena 1954, afite icyemezo kimwemerera gutura muri Amerika (Residence permit) akagira ubwenegihugu bw’u Bubiligi. Ni na byo byatumye ibyo bihugu bikomeza gushyira igitutu kuri Guverinoma y’u Rwanda ngo imurekure, hirengagijwe ibyaha yahamijwe n’ingaruka byagize ku Banyarwanda.

Mu kiganiro Ishusho y’Icyumweru cyatambutse kuri Televiziyo y’u Rwanda kuri iki Cyumweru, tariki ya 14 Kanama 2022, Umuvugizi Wungirije wa Guverinoma, Alain Mukuralinda, yavuze ko kuba Amerika yakurikirana ifungurwa rya Rusesabagina nta kibazo kirimo.

Ati “Kuba yabaza ikibazo cy’umuntu utuye iwabo, ibyo ni ibisanzwe ibihugu byose birabikora. Nta mwenegihugu ushobora kugirira ikibazo ahandi ngo Minisitiri runaka cyane cyane uw’Ububanyi n’Amahanga cyangwa uw’Ubutabera abe yaza muri icyo gihugu ntibakibaze. Ni ibisanzwe.”

“Ni uburenganzira bwa Amerika iyo ivuga ko (Rusesabagina) afite residence iwabo kuko mu mategeko yabo barabyemerewe kubaza umuntu ufite residence iwabo.”

Mukuralinda yavuze ko ikosa rikomeye ari ukurenga ku gusaba no kubaza, ahubwo ugashaka gutegeka ko umuntu afungurwa, wirengagije ibyatumye afungwa.

Ati “Ni uburenganzira bwo kubaza, ni uburenganzira bwo gusaba ariko ntabwo ari uburenganzira bwo gutegeka. Ntabwo ari uburenganzira bwo kurenga inzego zacu, ntabwo ari uburenganzira bwo kuvuguruza ibyemezo by’inkiko cyangwa se bya Leta yacu.”

Na mbere y’uko Blinken agera mu Rwanda, Amerika yasohoye itangazo igaragaza ko Rusesabagina afunzwe mu buryo bunyuranyije n’amategeko.

Blinken amaze kugera mu Rwanda yongeye kubivuga ndetse agaragaza ko u Rwanda rukomeje kwinangira, rushobora gufatirwa ibihano bizwi nka Khashoggi ban.

Ubwo haburaga iminota mike ngo Blinken agere mu Rwanda, Perezida Paul Kagame ni umwe mu banditse kuri Twitter bagaragaza ko ibyo Amerika ishaka bidashoboka.

Mukuralinda yavuze ko ubusanzwe Amerika yakabaye ijya mu mizi y’uko urubanza rwa Rusesabagina rwagenze, ikazana ibimenyetso bihinyuza ibyahereweho ahamywa icyaha.

Yagize ati “Basabye ko yarekurwa ku mpamvu z’uko yaba arwaye, birinda gusaba ko yafungurwa bavuga bati wenda ibyaha ntiyabikoze […] ntabwo bakomoza ku mpamvu zirebana n’ibimenyetso n’amategeko kuko byo birabagonga. Bakabanza kubisasira ngo uburyo yafashwe, ngo hari uburenganzira butubahirijwe ariko ntibavuga ubwo aribwo kuko urubanza rwabaye ku mugaragaro.”

Yakomeje avuga ko Amerika isa nk’iyivuguruza, iyo yemera ko FDLR ari Umutwe w’Iterabwoba ubangamiye amahoro mu Karere ariko igashyigikira Rusesabagina wiyemereye kenshi ko akorana na yo.

Alain Mukuralinda yavuze ko Rusesabagina azakomeza gufungwa nk’uko amategeko abiteganya, ibyo gufungurwa kwe bigakorwa nk’uko bigenda ku zindi mfungwa.

Ati “Ese mwabonye ko ibisabwa atari we (Rusesabagina) ubyisabira? Kuki buri gihe atari we ubyisabira? Abisabirwa n’abandi. Mwari mwumva Rusesabagina abyivugira? Mwari mwabona yandika akabaruwa ati nyabuneka? Ubwo se ibyo wibwira ko Guverinoma y’u Rwanda itabibona?”

Yongeyeho ati “Hari abagiye basaba imbabazi turabazi […] umuntu ntanisabira, ni abandi bamusabira, kubera iki se? Azisabiye akurikije amategeko, icyemezo gifatwa na Perezida wa Repubulika. Ashobora kuzimwima cyangwa akazimuha.”

Mu ruzinduko rwe i Kigali, abagizweho ingaruka n’ibitero bya FLN ya Rusesabagina basabye Blinken guhura ngo bamubwire akababaro ke, arabyanga.

Mu kiganiro n’abanyamakuru, ahubwo Blinken yavuze ko yageze mu Rwanda yavuganye n’umuryango wa Rusesabagina.

Amerika imaze iminsi isaba u Rwanda kurekura Rusesabagina, icyakora nyir'ubwite ntiyemera ibyaha yakoze dore ko yikuye mu rubanza rutararangira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .