00:00:00 IGIHE NETWORK KN KINYARWANDA EN ENGLISH FR FRANCAIS

Kibeho: Ibyo Leta yabasezeranyije yarabisohoje, ariko hari ibyo Kiliziya ikwiye gukora

Yanditswe na Mutangana Steven
Kuya 15 Kanama 2022 saa 08:58
Yasuwe :

Ubwanditsi: Ibikubiye muri iyi nkuru ni ibitekerezo bwite by’umusomyi wa IGIHE, Mutangana Steven.

Ku itariki ya 31 Gicurasi 2003 nari i Kibeho, ubwo Perezida w’Inteko Ishinga Amategeko y’u Rwanda - Umutwe wa Sena - yabwiraga abari bahateraniye icyo Leta y’u Rwanda ihateganyiriza.

Ibyo Leta yabasezeranyije yarabisohoje, ariko hari ibyo Kiliziya ikwiye kurushaho gukora nayo igasohoza neza inshingano mu gihe kirambye, mu rwego rwo kumenyekanisha ubutumwa bwa Kibeho mu myaka magana iri imbere.

Uko mbibona nyuma y’imyaka irenga 20 njya i Kibeho:

Hari hashize imyaka 19 Leta ibasezeranyije ibikorwa remezo

Ku wa 31 Gicurasi 2003 i Kibeho habereye ibirori by’akataraboneka. I Vatican bohereje Cardinal Crescenzio Sepe wari mu bagize Guverinoma ya Papa Jean Paul II, aha umugisha shaperi (chapelle) yibutsa amabonekerwa ya Kibeho.

Umuhango wo gutaha Ingoro ya Bikira Mariya i Kibeho witabiriwe na Perezida w’Inteko Ishinga Amategeko - Umutwe wa Sena - Dr Vincent Biruta, Minisitiri w’Intebe Bernard Makuza n’abandi bayobozi mu nzego za Leta n’iza Kiliziya Gatolika ndetse n’abari bavuye mu mahanga.

Mu ijambo yahavugiye mu izina rya Perezida wa Repubulika, Dr Biruta yabwiye abari aho ko Leta y’u Rwanda yakiriye neza ibibazo izunganiramo Diyosezi ya Gikongoro.

Yagize ati "Byaba ibijyanye n’umuhanda, byaba ibijyanye n’amashanyarazi, njye numvise bifite ishingiro; nk’uko naje ndi intumwa nanjye nzabatumikira ku wo naje mpagarariye uyu munsi, kandi ndahamya ko azabyakira neza. Nkaba nemeza ko hari ibishobora gukorwa, nubwo bitakorerwa rimwe byose, ariko icya ngombwa ni uko hagira igitangira buhoro buhoro n’ibindi bikazaza bibisanga, ndizera ko bizashoboka."

Muri 2010, Perezida wa Repubulika Paul Kagame yabwiye ab’i Nyaruguru ko ibikorwa remezo bikenewe nk’imihanda bizubakwa.

Ati "Nyaruguru, mwahoze muvuga abinjiza amafaranga, ndayabona aza atemba nk’amazi. Ubukerarugendo bwa Kibeho n’imihanda mukeneye turaza kuyubaka. N’amashanyarazi araza kutumurikira, kereka udashaka kubona…"

Ibyo bikorwa remezo byarubatswe byose ndetse umuntu yakwemeza ko hiyongereyeho n’ibindi byinshi abantu batatekerezaga ko byagera i Kibeho muri Nyaruguru.

Koko rero, ubwo inkuru za Kibeho zatangiraga kuvugwa mu mpera ya za 1981, hari ahantu hakennye cyane, hatagira amazi, amashanyarazi, ibitaro, ibyoroshya ubwikorezi bw’abantu n’ibintu n’ibindi. Ubu byarahageze hari n’ibyoroshya itumanaho rigezweho, amacumbi n’ibindi.

Kuva 2001 hemejwe ko koko habereye amabonekerwa, icyemezo cya Kiliziya Gatolika cyahagize ahantu ha mbere muri Afurika hafite amateka nk’aya. Harasurwa n’abantu ibihumbi baturuka imbere mu Rwanda no mu mahanga.

Hari icyo Kiliziya yakora kurushaho

Kuba Kibeho ari ahantu ndangamurage hafite umwihariko muri Afurika, bikwiye gutuma hari ibikorwa bifitanye isano n’amateka yaho bishyirwaho.

Iyo abantu bahageze, barakirwa, bagahabwa ibiganiro, bagasomerwa misa, bagahabwa amasakaramentu, bagatarama, bagasenga. Hari n’ubwo bahabwa ibiganiro n’umwe mu babonekewe uhaba. Ni byiza, ariko hari ibyo ntarabona bikorwa kandi bikenewe.

Hagati ya 1981-1989 ni cyo gihe cyemejwe ko cyabereyemo amabonekerwa mu bushakashatsi Kiliziya yakoze, igatangaza burundu ibyabuvuyemo mu 2001.

Muri cyo gihe, bamwe mu babikurikiraniraga hafi bibuka ko hafatwaga amajwi, amafoto na video.

Iyo urebye uko ahandi babigenza, usanga amajwi, amafoto na video by’umwimerere byatoranyijwe bigatunganywa neza biri mu byifashishwa mu gusobanurira abagana ahantu ndangamurage nka Kibeho, ariko ibyo bihamyamateka ntibijya bikoreshwa mu kwamamaza ubutumwa bwa Kibeho.

Mu gitabo kivuga uko ayo mabonekerwa yagenze cyanditswe muri 1984 (Des Apparitions à Kibeho. Annonce de Marie au cœur de l’Afrique), uretse amagambo yandukuwe uko yakabaye agashyirwa mu rurimi rw’amahanga, harimo n’ibimenyetso bigaragaza ko abantu banyuranye (abanyamakuru, abihaye Imana, abakirisitu, Abanyarwanda n’abanyamahanga) bifashishaga ibikoresho byabugenewe bafata ijwi ry’uwabaga abonekerwa.

Hari amakasete yifashishwaga nyuma mu kumenya cyangwa mu kugenekereza icyo Bikira Mariya yabwiraga uwabonekewe. Ngo hanakurikiragaho guhata ibibazo uwabonekewe kugira ngo abakora ubushakashatsi kuri ibyo bintu bidasanzwe bakore inyandiko y’ibyabaye. Ese ayo majwi ari he ?

Rimwe nigeze kubaza abashinzwe ’Sanctuaire de Kibeho’ banyemerera ko amajwi koko yagiye afatwa mu bihe bitandukanye by’amabonekerwa.

Basobanura ko kuba ayo majwi atajya ahagaragara ari uko ntayo Kiliziya ifite, ko bishobotse ababa barayafashe bazayabagezaho! Iki kibazo ni nako cyasubijwe na Diyosezi ya Gikongoro ubwo nabikoragaho ubushakashatsi.

Umwe mu bo nabajije uzi akamaro kabyo yagize ati "Byakumvikana bite niba [Kiliziya] yarabitse impapuro z’ubutaka bwayo mu myaka irenga 100 ishize, ariko iby’ibihamyamateka byerekeye ubutumwa Ijuru ryavugiye mu Rwanda ribwira Isi yose ntibisigasire?"

Ubundi izo gihamya ziri mu majwi n’amashusho (patrimoine archivistique de l’audiovisuel) ziba zigomba kubungabungwa hazirikanwa abazabaho mu myaka magana izaza.

Byafasha ko ubutumwa bwaho bugumana umwimerere, ku buryo nta muntu uzagira icyo yongeramo cyangwa agabanya mu byabereye mu mabonekerwa ya Kibeho, uko ubu butaka butagatifu bukomeza gutezwa imbere bikaba ari ko umurage ndangamateka, na gihamya zawo birushaho kubungabungwa.

Niba ayo majwi n’amashusho bitaregeranywa, hajyeho uburyo ashakishwa, ashyingurwa mu buryo bugezweho bw’ikoranabuhanga (archives numériques) nk’uko n’ahandi bigenda.

Tuzirikane ko mu bagenda i Kibeho harimo abashakashatsi baturuka imihanda yose baba bagomba kubona amakuru arenze ayo utazi gusoma no kwandika abona.

Iby’izi "archives" biri mu byabakurura bakahatinda kandi bakazasohora inyanadiko (ibitabo, inkuru, documentaires…) zishyira Kibeho ku rwego rushimishije.

Kibeho ni isoko y'ubukerarugendo nyobokamana kubera amabonekerwa yahabereye

Mutangana Steven
Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .