00:00:00 IGIHE NETWORK KN KINYARWANDA EN ENGLISH FR FRANCAIS

Abarengeje imyaka 18 batangiye guhabwa doze ya kabiri y’urukingo rushimangira rwa COVID-19

Yanditswe na IGIHE
Kuya 13 Kanama 2022 saa 02:12
Yasuwe :

Minisiteri y’Ubuzima (Minisante) yahamagariye abantu bose barengeje imyaka 18 bamaze amezi ane bahawe doze ya mbere y’urukingo rushimangira rwa Covid-19, kwihutira kujya kuri site y’ikingira bagahabwa doze ya kabiri.

Guhera ku wa Mbere tariki ya 8 Kanama 2022 nibwo u Rwanda rwatangiye gutanga doze ya kabiri ishimangira ariko hibandwa ku bakuze bari hejuru y’imyaka 60 n’abandi bafite intege nke z’umubiri.

Minisiteri y’Ubuzima kuri uyu wa Gatandatu tariki 13 Kanama 2022, mu butumwa yanyujije kuri Twitter, yavuze ko ‘niba hashize amezi nibura ane uhawe doze ya mbere ishimangira ihutire kuri site y’ikingira ikwegereye uhabwe iya 2 ishimangira’.

Yakomeje ivuga ko ‘N’undi wese uri hejuru y’imyaka 18, akaba amaze amezi ane ahawe doze ya mbere ishimangira yemerewe guhabwa doze ya kabiri ishimangira. Ingimbi n’abangavu bari munsi y’imyaka 18 bo ntibaratangira guhabwa doze zishimangira’.

Umunyamabanga wa Leta muri Minisiteri y’Ubuzima, Dr Mpunga Tharcisse, aherutse gutangaza ko gutanga doze ya kabiri y’urukingo rushimangira byatewe n’imihindagurikire ya virusi ikomeje kubaho.

Yagize ati "Virus ya COVID-19 igenda ihindagurika kandi inkingo dukoresha zakozwe hagendewe kuri virusi yari iriho icyorezo kicyaduka. Twatangije gahunda ya doze ya kabiri ishimangira y’urukingo rwa COVID-19 duhereye ku bakuze n’abandi bafite intege nke mu mubiri."

Imibare ya Minisante yerekana ko ku wa Gatanu tariki 12 Kanama 2022 mu Rwanda habonetse umuntu umwe wanduye Covid-19 akaba yabonetse mu bipimo 4.035.

Uwo muntu umwe wanduye yabonetse i Kigali. Nta muntu witabye Imana, imibare igaragaza ko abamaze kwitaba Imana mu Rwanda bazize Covid-19 ari abantu 1.466.

Ubushakashatsi bwerekanye ko abantu bahabwa inkingo nyinshi za COVID-19 bigenda bigabanya ibyago byo kwandura no kuzahazwa n’iyi ndwara.

Ubushakashatsi bwakorewe muri Israel, igihugu kiri mu bimaze gutanga inkingo nyinshi za COVID-19, bwerekanye ko nk’abaganga bamaze guhabwa inkingo enye bafite ibyago bike cyane byo kwandura.

Ni ubushakashatsi bwatangajwe mu kinyamakuru cya American Medical Association.

Bwerekanye ko nk’abaganga bahawe inkingo enye za mRNA (Pfizer cyangwa Moderna), bagezweho n’ubwandu kuri 7%, mu gihe abahawe inkingo eshatu, urwa gatatu bakaruhabwa kugeza mu mpera za Nzeri umwaka ushize, banduye kuri 20%.

Leta Zunze Ubumwe za Amerika yo irimo kugira ihame urukingo rwa gatatu (urwa mbere rwo gushimangira) ku bantu baregeje imyaka itanu.

Ni mu gihe abarengeje imyaka 50 bemererwe urukingo rwa kabiri rwo gushimangira, cyangwa abantu barengeje imyaka 12 bafite ubundi burwayi bukomeye.

Kugeza ubu inkingo zitangwa muri doze zo gushimangira ni iza Pfizer-BioNTech, Moderna na Jansen.

Abarengeje imyaka 18 bamaze amezi ane bishimangije basabwe kujya kwishimangiza bwa kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .