Byatangajwe mu bushakashatsi bwakozwe n’ikinyamakuru cyandika ku buzima, The Lancet.
Uyu mugabo ni we wagiye kwigurira inkingo, aziterwa mu gihe cy’amezi 29 nk’uko BBC yabitangaje.
Abakoze ubushakashatsi ni abo muri Kaminuza ya Erlangen-Nuremberg, berekanye ko nubwo inkingo uwo mugabo yafashe ari nyinshi, isuzuma yakorewe ritigeze rigaragaza ingaruka yaba yaratewe nazo.
Dr Kilian Schober uri mu bakoze ubushakashatsi, yavuze ko amakuru y’uko uwo mugabo yafashe inkingo nyinshi bayamenye bayavanye mu kinyamakuru cyo mu Budage.
Byatumye bajya kumukoraho ubushakashatsi ndetse n’Ubugenzacyaha bukora iperereza ngo hemezwe niba koko izo nkingo zarafashwe, biza kugaragara ko yazifashe.
Icyo abashakashatsi bashakaga, ni ukumenya uburyo abasirikare b’umubiri bitwara mu gihe umuntu atewe inkingo nyinshi zingana gutyo.
Ubusanzwe inkingo za Covid-19 uburyo zikozwemo, ni ikoranabuhanga rizwi nka mRNA, aho hakorwa igisa na virusi y’indwara urukingo rugamije kurwanya igaterwa mu mubiri, noneho umubiri wo ukiyubakamo ubudahangarwa bwo guhangana n’iyo ndwara bigatuma n’igihe iyo ndwara iramutse imugezeho, itamubasha kuko umubiri wamaze kwiyubakamo ubushobozi.
Abashakashatsi ubwo bajyaga gusuzuma uwo mugabo, bari bafite ubwoba ko inkingo kubera ubwinshi bwazo, zaba zarananije abasirikare b’umubiri.
Nta kimenyetso ubushakashatsi bwabo bwabonye cyerekana ko abasirikare b’umubiri w’uwo mugabo,baba barananijwe no guterwa inking nyinshi.
Nubwo bimeze bityo, abashakashatsi banzuye ko uburyo bwiza bwo kwirinda Covid-19 ari uguterwa inkingo eshatu kuko arizo zikenewe ngo umubiri wiyubakemo ubudahangarwa.
TANGA IGITEKEREZO
AMATEGEKO AGENGA IYANDIKA RY'IGITEKEREZO CYAWE
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni, Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe. Ibi bidakurikijwe igitekerezo cyanyu gishobora kutagaragara hano cyangwa kigasibwa.
Igitekerezo cyawe kigaragara nyuma y'isuzuma rikorwa na IGIHE.com , Murakoze!