Magingo aya, abantu baba ku Isi gusa kandi nta n’ikimenyetso kiragaragaza ko hari ahandi babaye mu isanzure. Uretse umuntu, nta n’ibindi binyabuzima bizwi neza ko biba mu isanzure kuko ntabyo siyansi yari yemeza.
Ibivejuru (Aliens) ni byo bikekwa ko biba mu isanzure, ariko nabyo ntibyemezwa na siyansi ahubwo bamwe bemera ko bibaho abandi bakabihakana.
Umushinga wa Breakthrough Starshot watangijwe mu 2016, ugamije gukora ubushakashatsi bwifashisha ikoranabuhanga rigezweho hagenzurwa imiterere y’inyenyeri yitwa Alpha Centauri.
Muri uwo mushinga washowemo miliyoni 100 $, hazoherezwa mu isanzure udukoresho tw’ikoranabuhanga wagereranya na twa mudasobwa duto cyane [batwise nonocrafts).
Ni udukoresho duto ku buryo kamwe kabumbatirwa mu kiganza, ariko tugira uburyo bwo kubika umuriro, aho tubasha kubonwa n’ikoranabuhanga, ndetse tukagira Camera zizafata amafoto yo kuri iyo nyenyeri. Amafoto afatwa azajya yoherezwa ku Isi.
Ntabwo biremezwa neza igihe uwo mushinga uzarangirira, ariko hagaragazwa ko bizatwara imyaka myinshi.
Stephen Hawking na Yuri Milner bibaza niba koko “umuntu azaba ku Isi ubuzima bwe bwose, cyangwa ashobora no kugera ku nyenyeri” cyane ko habarurwa miliyari nyinshi zazo mu isanzure.
Ni muri urwo rwego bashatse gusubiza icyo kibazo bategura inyigo bahereye ku yitwa Alpha Centauri iri hafi y’imibumbe igaragiye izuba.
Uretse Breakthrough Starshot, Ikigo cy’Abanyamerika gikora ubushakashatsi mu isanzure, NASA, gifite umushinga cyise Artemis wiga ku Kwezi na Mars naho Space X ya Elon Musk iri kwiga kuri Mars.
TANGA IGITEKEREZO
AMATEGEKO AGENGA IYANDIKA RY'IGITEKEREZO CYAWE
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni, Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe. Ibi bidakurikijwe igitekerezo cyanyu gishobora kutagaragara hano cyangwa kigasibwa.
Igitekerezo cyawe kigaragara nyuma y'isuzuma rikorwa na IGIHE.com , Murakoze!