Obadiah Arthur Noel ni umukinnyi w’imyaka 25 ukinira Westchester Knicks muri NBA G League akaba ari Umu-Shooting Guard.

Mu myaka ibiri amaze muri iyi kipe ni umwe mu bo igenderaho cyane, akaba abarirwa gutsinda amanota 14 na rebound ebyiri ku mukino.

Undi mukinnyi Ikipe y’Ingabo yongeyemo ni Umunya-Misiri, Abdullah Ahmed w’imyaka 21 ukina nka Pivot.

Uyu mukinnyi na we akinira Westchester Knicks muri NBA G League. Ni umwe mu bagomba kuzafasha APR BBC mu mikino ya BAL cyane ko uyu mwanya ari umwe mu bo yaburaga.

Uyu musore ni umwe mu bari bagize Ikipe y’Igihugu ya Misiri y’Abatarengeje imyaka 18 yegukanye Igikombe cya Afurika mu 2020.

Aba bakinnyi bombi biyongereye ku bandi Ikipe y’Ingabo yaguze muri uyu mwaka nka Adonis Filer, Dario Hunt, Zion Styles na Chris Ruta. Gusa amakuru avuga ko iyi kipe igisigaje kugura undi mukinnyi umwe.

Ni ku nshuro ya mbere APR BBC igiye kwitabira iri rushanwa rihuza amakipe yabaye aya mbere iwayo rigiye gukinwa ku nshuro ya kane.

Ikipe y’Ingabo iri mu gace ka Sahara Conference kazakinira muri Sénégal kuva tariki ya 4 kugeza 12 Gicurasi 2024, aho kugira ngo ibone itike y’imikino ya ¼ izabera mu Rwanda muri BK Arena, bizasaba ko iba mu makipe abiri ya mbere mu itsinda irimo hamwe na AS Douanes yo muri Sénégal, US Monastir yo muri Tunisia na Rivers Hoopers yo muri Nigeria.

Umunyamerika, Obadiah Noel yongewe mu bakinnyi APR BBC izifashisha muri BAL

Umunya-Misiri, Abdullah Ahmed ni umwe mu bakinnyi bashya ba APR BBC