Windows 10 S ni porogaramu nshya ya mudasobwa kandi yihuta, umunyeshuri cyangwa umwarimu uyifite mu mashini ye azajya abasha kubona izindi porogaramu nka Office 365 ndetse n’izindi zose azajya avana kuri internet zikazajya ziba zifite umutekano wizewe.

Undi mwihariko ni uko izana na Microsoft Edge ifasha umuntu kujya kuri internet, ikazaborohereza mu bushakashatsi ku bintu bitandukanye no gukora imikoro irebana n’amasomo biga.

Ifatanyije n’izindi nganda zirimo Acer, ASUS, Dell, Fujitsu, HP, Samsung na Toshiba, hari gukorwa mudasobwa zifite ubushobozi bwo kwakira Windows 10 S, imwe ikazajya igurwa amadolari 189.

Mu mpera z’uyu mwaka kandi hazashyirwa hanze Microsoft Teams, izajya ihuriza hamwe abarimu n’abanyeshuri n’abandi bashobora gutuma imyigishirize irushaho kunozwa.

Hamwe n’indi yitwa OneNote Class Notebooks kandi, abarimu bazajya boroherwa no gutanga imikoro n’ibizamini by’igihe gito, gutanga amanota no kubagezaho imfashanyigisho.

Microsoft kandi yanavuguruye umukino wa Minecraft, aho yongeyemo uburyo bufasha abanyeshuri gukora porogaramu zitandukanye no kurushaho gusobanukirwa akamaro kabyo.

Uyu mukino ubusanzwe ufasha abanyeshuri gufunguka mu mutwe, bituma barushaho gutekereza uburyo bakemura ibibazo bibugarije, wahujwe na porogaramu zigisha kubaka porogaramu zirimo Tynker, ScratchX na MakeCode.

Abasanzwe bakina uyu mukino hirya no hino ku Isi, bazajya bahabwa umwaka w’ubuntu. Amashuri ayikeneye ashobora kuyibona binyuze kuri Microsoft Store for Education, ahabarizwa porogaramu zose zijyanye n’ubucuruzi.

Uretse izi porogaramu kandi, Microsoft yanakoze mudasobwa nshya yitwa Surface Laptop na yo irimo Windows 10 S, ikaba igenewe abiga muri Kaminuza, ikaba ariko itaragera ku isoko.

Kuva tariki ya 15 Kamena, abatuye mu bihugu bigera kuri 20 bazaba bemerewe gutangira kuyitumiza mbere y’uko igera ku isoko, imwe ikaba igura amadolari 999.