Nyuma y’umutagara w’ingoma utangiza iki gitaramo, umuhanzi Kalinijabo Ignace yageze ku rubyiniro atangira kwinjiza abakunzi b’umuziki gakondo mu gitaramo cyari kiyobowe na Murenzi Emmalito afatanyije na Ikinyange Alice Masinzu.

Uyu muhanzi yasimbuwe n’Itorero Inyamibwa rya AERG ryamaze iminota isaga 50. Abakobwa bagize iri torero banyuze abitabiriye iki gitaramo binyuze mu ndirimbo zirimo "Rusanda n’izayo"; “Dufite Abeza”, “Iwacu” n’izindi.

Abahungu bagize Itorero Inyamibwa bahamirije babyina Urusengo, Ikinimba bita Indarire n’Ikinyemera bita Nyamunini.

Bakurikiwe na Munganyinka Alouette yanzika mu ndirimbo zirimo iza Cécile Kayirebwa nka ‘Rwanda’, ageze ku ‘Umunezero’ abantu bahagukira hejuru batarama na we kugeza asoje.

Gakondo Iganze bateguye iki gitaramo bageze ku rubyiniro bakirizwa amashyi n’impundu baririmba bagira bati "Gakondo yacu Iganze igere hose ".

Ubwo bari bageze kuri “Ihorere Munyana” abayumvise bahagurikiye rimwe bakoma amashyi ari na ko bagerageza kwigana imbyino zimwe na zimwe bajyana n’abataramyi.

Muyango wari utegerejwe cyane yinjiye ku rubyiniro yanzika aririmba indirimbo yise "Mwiriwe neza” akomereza kuri “Sabizeze” n’izindi.

Ubwo Muyango yari agiye kuva ku rubyiniro bamusabye ko ahaguma akabongeza indirimbo ebyiri abaririmbira iyo yise "Karame Uwangabiye".

Massamba yatunguranye asoza iki gitaramo

Nubwo amasaha yari yakuze Murenzi Emmalito wari iyoboye iki gitaramo kwihangana byamwanze mu nda ahamagara Massamba Intore ku rubyiniro amusaba gusuhuza abitabiriye.

Massamba wanejejwe no kubona abana bato batarama yafashe umwanya aririmba indirimbo zirimo "Inkotanyi Cyane","Dushengurukanye Isheja", “Sisi Wenyewe” asoza mu ndirimbo zirimo “Intsinzi” ya Mariya Yohana.

Massamba Intore na Muyango basabye ko ibitaramo nk’ibi bikomeza kuba ari byinshi kuko ari imwe mu nzira zafasha mu gukomeza gushyigikira umuco n’umuziki gakondo.

Umuyobozi w'itorero Inkindi n'Amariza Carine Karambizi yari yaje gushyigikira abataramyi bagenzi be

Umuhanzi Kalinijabo niwe wabimburiye abandi baririmbyi muri iki gitaramo

Muyango banze ko ava ku rubyiniro bamusaba kubongeza indirimbo

MC Murenzi Emmalito yamanutse ku rubyiniro afatanya n'abandi bacinya akadiho

Massamba yishimiye kubona uburyo abana bato kuri we biziwe n'umuziki gakondo

Massamba Intore yishimiye kubona abakiri bato batarama baziwe n’inganzo gakondo

Massamba Intore yatunguranye muri iki gitaramo

Kwifata ntibiba byoroshye iyo wahuye n’abataramyi b’umuziki w'aho ukomoka

Itorero Inyamibwa ryanyuranye umucyo muri iki gitaramo

Itorero Gakondo Iganze (Indashyikirwa) bakoze iyo bwabaga batanga ibyishimo ku bitabiriye iki gitaramo

Inyamibwa zataramye biratinda

Inyamibwa zanyuranye umucyo mu gitaramo Gakondo Connect

Iki gitaramo cyateguwe na Iganze Events

Iki gitaramo cyateguwe na Iganze Events

Iki gitaramo cyari kiyobowe na Murenzi Emmalito

Igitaramo Gakondo Connect cyitabiriwe n’ingeri zitandukanye

Igitaramo nk'iki cya gakondo gitangizwa Umutagara w'Ingoma winjiza abitabiriye mu mujyo wo gutarama

Ibitaramo by’umuziki gakondo bisigaye bifite abakunzi benshi

Gakondo Iganze (Indashyikirwa) bishimiwe bikomeye muri iki gitaramo bise Gakondo Connect

Buri wese aho yari yicaye yasanganirwaga n'ibineza neza bigize umudiho gakondo

Byageze aho buri wese asiga intebe asanganira abandi bacinya akadiho

Alouette Munganyinka yakumbuje abataramyi Cecile Kayirebwa binyuze mu ndirimbo ze yaririmbye

Buri wese winjiye muri iki gitaramo yahagurutse mu byicaro bye acyumva umurishyo w'ingoma uvuze

Alice Masinzu yanyuzagamo agafatanya n'abandi gucinya akadiho

Alice Masinzu ni umwe mu bari bayoboye iki gitaramo

Abasore bagize Itorero Inyamibwa bahamirije babyina Urusengo

Abataramyi bageze ku rubyiniro bakomewe amashyi n’impundu

Abakunzi b’umuziki iyo bumvise indirimbo ibanyuze bahagurikira rimwe bagakoma amashyi ari nako bagerageza kwigana imbyino zimwe na zimwe bajyana n'abataramyi

Abakobwa bagize Itorero Inyamibwa baririmbye indirimbo zirimo “Dufite Abeza”

Abakunzi b’umuziki iyo bumvise indirimbo ibanyuze bahagurikira rimwe bagakoma amashyi ari nako bagerageza kwigana imbyino zimwe na zimwe bajyana n'abataramyi

Abakobwa bagize Itorero Inyamibwa bishimirwa na benshi iyo bigeze mu bitaramo nk'ibi

Amafoto: Kasiro Claude