Ni Iserukiramuco riri kubera mu Karere ka Rubavu kuva ku wa 1-2 Nyakanga 2023, aho aba DJs bakomeye ndetse n’abahanzi b’amazina akomeye bari gususurutsa abakunzi b’umuziki bari bakoraniye ku mucanga w’Ikiyaga cya Kivu.

Kuva kuwa Kane w’iki cyumweru, iyo wamahamagaraga inshuti isanzwe ituye cyangwa ikorera mu Karere ka Rubavu inyikirizo yari “Ubwo nawe ugiye kumbaza aho urara!”

Amacumbi, amahoteli ndetse n’inzu zakira ba mukerarugendo n’abashyitsi mu Karere ka Rubavu zari zakubise zuzuye, hatitawe ko benshi ibiciro bari babihanitse hafi gukuba kabiri ibisanzwe.

Aha ndakoresha urugero rw’iyitwa Kivu Beach Garden ubusanzwe ifite ibyumba ku biciro bitandukanye, gusa ubwo nahafataga icyumba nifashishije ikoranabuhanga banyerekaga ko kiri kugura ibihumbi 32Frw.

Naje gutungurwa n’umwe mu bakozi bayo wampamagaye ambwira ko babonye ko mfashe icyumba nkoresheje ikoranabuhanga ariko icyumba nsabye kiri kugura amadorali 50 (arenga ibihumbi 50Frw).

Si aha gusa, ahitwa Saga Bay ni akabari kari mu tugezweho gusa si kenshi kukinjiramo bisaba kwishyura. Abahasohokeye mu ijoro ryo ku wa Gatandatu tariki 1 Nyakanga 2023 basabwaga kwishyura ibihumbi 10Frw mu gihe serivise batanga nta cyari cyahindutse.

Icyakora nubwo bishyuje aya mafaranga ku muryango, ntabwo byabujije abatari bake kuhasohokera cyane ko abarenga 300 bari bahakoraniye.

Ubwo nabaraga iz’ahandi ntarinjira mu Iserukiramuco nyiri zina aho, kwinjira byari ibihumbi 10Frw mu myanya isanzwe, ibihumbi 25Frw mu myanya isanzwe n’ibihumbi 40Frw ku bashaka kwitabira iminsi ibiri.

Ku ikubitiro abahanzi Kenny Sol na Chris Eazy nibo babimburiye abandi muri iki gitaramo, basusurutsa abarenga igihumbi bari bakoraniye ku mucanga w’ikiyaga cya Kivu biyumvira umuziki n’akayaga kava mu mazi.

Ni igihe cy’akanyamuneza kuri benshi basohokeye i Rubavu, bikaba inyungu ku bakunzi b’umuziki bo muri aka Karere begerejwe igitaramo gikomeye kibazanira abahanzi b’amazina akomeye.

Aba bahanzi babimburiye Kivumbi na Diamond Blaq bategerejwe mu gitaramo kiba ku wa 2 Nyakanga 2023.

Skol yari yateguye bikomeye

Ku mucanga ahagombaga kubera ibirori bya Kivu Fest hari hateguwe bikomeye

Ku mucanga inkweto si ikintu witaho cyane

Abantu batangiye binjira urusorongo ariko baza kugwira

Ni igitaramo kitabiriwe n'abiganjemo urubyiruko

Umugoroba ugeze benshi batangiye kwinyakura berekeza ahabereye Kivu Fest

Ba mucoma nabo bari biteguye kumara inzaara abitabiriye iki gitaramo

Ubundi aha igitaramo cyari gitangiye bya nyabyo, umuziki utangiye gucekwa

Nta wagiriye icyaka muri Kivu Fest kuko Skol yari yamanuye ibinyobwa byose yenga

Iyo watanze abandi ku mucanga DJ akaguha indirimbo wifuza ukurikizaho kwigaragaza mu mudiho

Umuziki wabyinywe bya nyabyo

Uko amasaha yisunikaga niko abahanga bo kurya ikirori bigaragazaga

Si Abanyarwanda gusa, n'abanyamahanga bari babukereye

Kivu Fest ni kimwe mu bitaramo bimaze kubaka izina ku buryo bikurura na bamukerarugendo

Abantu bari batangiye kugwira

N'abanyamahanga banyuzwe

Aba DJs batandukanye batanze ibyishimo ku bitabiriye iri Serukiramuco

Wari umwanya mwiza wo gusabana

Chris Eazy ni we wabanje ku rubyiniro

Chris Eazy yageze aho yegera abafana be

Ni ubwa mbere Chris Eazy yari aririmbye muri Kivu Fest

Chris Eazy yari yitwaje ababyinnyi

Mu ndirimbo ze Inana, Amashu, Ese urabizi n'izindi nyinshi, Chris Eazy yanyuze abakunzi be

Nyuma ya Chris Eazy hakurikiyeho Kenny Sol

Byari ibyishimo kuri Kenny Sol wataramiraga abakunzi be b'i Rubavu

Benshi bashakaga gucyura amashusho y'urwibutso

Umunsi wa mbere wa Kivu Fest washimishije abawitabiriye

Ibysihimo byari byose

Abafana batashye batanyuzwe bahigira kwimara ipfa ku munsi wa kabiri w'iri serukiramuco

Abafana bari benshi mu gitaramo cy'umunsi wa mbere wa Kivu Fest

Kenny Sol ni we wasoje igitaramo cy'umunsi wa mbere wa Kivu Fest

Amafoto: Nezerwa Salomon

Video: Bizimana Confiance