Amasezerano abishimangira yashyizweho umukono ku wa 28 Kamena 2023, ku munsi wa mbere w’uruzinduko Perezida Kagame na Madamu Jeannette Kagame bagiriye muri Seychelles.

Ivanwaho rya viza ku Banyarwanda bakorera ingendo muri Seychelles, rizafungurira amarembo abashaka gutemberera muri iki gihugu giherereye mu Nyanja y’Abahinde.

Seychelles ni igihugu kiri ku buso bwa kilometerokare 455. Yakolonijwe n’u Bufaransa n’u Bwongereza kugeza mu 1976 ubwo yabonaga ubwigenge.

Iki gihugu gituwe n’abaturage bagera ku bihumbi 100 nk’uko imibare ya Banki y’Isi yo mu 2021 ibyerekana. Kuva mu 1960 kugera mu 2021, abagituye bavuye ku 41.700 bagera kuri 99.258, ni ubwiyongere bwa 138% mu myaka 61.

Umurwa Mukuru wa Seychelles ni Victoria. Uri mu bilometero 2833 uvuye i Kigali mu Rwagasabo. Ku rugendo rw’indege, umugenzi yakwishyura $552.

Sosiyete z’indege zikorerayo ingendo zirimo Qatar, Emirates, Etihad, Turkish Airlines, Ethiopian Airlines, Sri Lankan Airlines, Kenya Airways na Air Seychelles.

Isaha Seychelles igenderaho iri imbere ho abiri ugendeye ku yo mu Rwanda.

Abatuye iki gihugu bakoresha ‘ifaranga’ rya Seychellois Rupee, idolari rya Amerika, Iyero ry’i Burayi mu gihe indimi bavuga zirimo Igifaransa, Icyongereza na Seychellois Creole.

Imibare yo mu 202o, yerekana ko umusaruro umuturage umwe yinjiza ku mwaka (GDP per capita), ingana na $12.3. Abaturage benshi ba Seychelles bakora mu rwego rwo gutanga serivisi.

Ubukungu bwa Seychelles bushingiye ahanini ku musaruro w’ibikomoka ku bukerarugendo. Bunibanda ku birimo uburobyi, gutunganya inazi no kubyaza umusaruro ibikomoka ku biti.

Ni igihugu cyuje ahantu nyaburanga ho gusura…

Seychelles igizwe n’uturwa 115, twiganjemo udusozi tubereye kurora, ibiti bitoshye ndetse ifite umwihariko wo kugira ahantu henshi hanyura abakunda gusohoka by’umwihariko ku mucanga.

Ifite ahantu habereye ba mukerarugendo kuko ni ku mazi, hari ibyanya bikomye birimo inyoni, ahaboneka ubwoko burenga 250, inyamaswa nk’akanyamasyo [gapima ibilo bisaga 300] kaboneka hake ku Isi n’izindi.

Ikirwa cya Mahé, gifatwa nk’igikuru mu bigize Seychelles, gifite ubuso bwa kilometerokare 157,3; ni cyo kirimo Umurwa Mukuru, Victoria. Kibarizwamo Pariki y’Igihugu ya Morne Seychellois n’ahantu ho gusohokera ku mazi [beach] harimo Beau Vallon na Anse Takamaka.

Mahé ni cyo kirwa kinini kurusha ibindi mu bigize Seychelles

Victoria ni umujyi uri mu mito ku Isi ndetse ushobora kuwutembera ibice byinshi biwugize mu masaha atarenze 24 ku rugendo rw’amaguru.

Izina rya Seychelles ryatangiye kuzamuka ahanini nyuma ya 1997 na 1998, ubwo igihugu cyakiraga Irushanwa rya Miss World, ryabaye icyanzu cyo kumenyekanisha ibirwa bikigize. Kuva icyo gihe ba mukerarugendo batangiye kukigenderera cyane.

Ikigo gishinzwe Ibarurishamibare muri Seychelles cyatangaje ko iki gihugu cyakiriye abashyitsi 334.552 mu 2022, izamuka rya 81% ugereranyije n’umwaka wabanje wa 2021. Abasuye iki gihugu biganjemo abo mu Budage, u Bufaransa, u Burusiya, Israel, Leta Zunze Ubumwe z’Abarabu n’u Buhinde.

Amashyamba yo ku Kirwa cya Mahé yakuruye abacuruzi mu bice bitandukanye by’Isi ahanini kubera uburyo akungahaye ku biti bivamo imbaho n’inyamaswa z’ubwoko butandukanye.

Iki kirwa gifite hoteli zigezweho zirimo Four Seasons, Kempinski na Anantara n’izindi nka Six Senses Zil Payson iri mu Kirwa cya Félicité.

Usibye Mahé, iki gihugu kinafite ibindi birwa birimo Praslin na La Digue, na byo bisurwa cyane na ba mukerarugendo.

Praslin ikundirwa umutuzo uyirangwaho ndetse icumbikiye hoteli n’amacumbi yihagazeho muri Seychelles. Izengurutswe n’umuhanda n’undi umwe unyuramo hagati mu kirwa.

La Digue na yo iteye amabengeza ahanini bishingiye ku miterere y’amabuye ayibarizwamo, asa n’ayatunganyijwe neza ndetse kikagira ahantu henshi hari umucanga abantu bashobora gusohokera. Kugera kuri iki kirwa bisaba kajugujugu cyangwa ubwato. Bitewe n’ubuke bw’imodoka zikirimo, ba mukerarugendo bakunda kwifashisha amagare mu ngendo.

Seychelles ni kimwe mu bihugu bitekanye ndetse ba mukerarugendo bahagenda batikandagira. Urwego ibyaha bikorwaho ruri ku gipimo cya 3.68, kingana n’icya Canada ifite 3.67; uko amanota aba make ni ko umutekano uba wizewe.

U Bwongereza bufite amanota 4.89, Amerika ni 5.5, u Bufaransa 5.67 mu gihe u Budage ari 4.9. Ugendeye kuri ya mibare ya ba mukerarugendo, Seychelles itekanye kurusha ibihugu baturukamo.

Seychelles iri mu bihugu byihagazeho bigendanye n’ikiguzi cy’ubuzima bwo kuhaba, bishingiye ku kuba byinshi mu bicuruzwa bicyinjizwamo biva hanze.

Abanya- Seychelles benshi ni abayoboke ba Kiliziya Gatolika, ariko hari n’abandi babarizwa mu Bahindu n’aba- Buddhists.

Ku kijyanye n’imyambarire usanga nta muco wihariye ukurikizwa ndetse benshi usanga biyambariye amakabutura n’imipira.

Abasura n’abatuye Seychelles na bo bizihirwa no gukina imikino itandukanye irimo na casino ndetse n’abashoboye ka manyinya barakagotomera nta nkomyi.

Kajugujugu igenzura Ikirwa cya Praslin iri ahirengeye mu kirere

Uruvange rw'amazi n'amabuye rutuma uyareba yizihirwa

Ijoro ryo mu mazi muri Seychelles riba riryoheye uyagendamo

Anse Georgette Beach na ho hateye amabengeza

Anse Volbert Village ni agace ko muri Seychelles

Ikirwa 'La Digue' kiri mu bisurwa na ba mukerarugendo benshi muri Seychelles

Hari ubusitani bubonekamo ibyatsi bitandukanye

Seychelles ni igihugu kiri rwagati mu Nyanja y’Abahinde

Imikino ya 'casino' iri mu bikoreshwa cyane

Rumwe mu nsengero rwitiriwe 'Immaculée'

Kimwe mu bibumbano bishushanya Umujyi wa Victoria. Cyubatswe mu 1978 mu kwizihiza imyaka 200 yari ishize Ikirwa cya Mahé gitangiye guturwaho

Coco de Mer Hôtel et Suites Black Parrot ifite inyenyeri enye

Ng'iyo imiterere ya Constance Ephelia Resort

Carana Beach Hotel na yo iri ku Kirwa cya Mahé

Hotel Constance Lemuria iri mu Kirwa cya Praslin

Dhevatara Beach Hotel iri ku Kirwa cya Praslin

Four Seasons Resort Seychelles ni rimwe mu macumbi ajyanye n'igihe

Anse Source d'Argent ni hamwe mu hantu hasohokerwa na benshi mu basura Seychelles

Mu duce dutandukanye hakoreshwa kajugujugu mu gusura ibyiza nyaburanga

Usanga henshi ahari umucanga ufatanye n'amazi y'Inyanja y'Abahinde

Hoteli zubakwa muri Seychelles zijyanye n'igihe

Urusengero rw'Abahindu 'Hindu Temple' ruherereye mu Mujyi wa Victoria rwagati

Imyubakire yo muri Seychelles yibanda ku nyubako ziteye amabengeza

Kubera amazi menshi, ingendo nyinshi zikorwa hifashishijwe ubwato

Kempinski Seychelles Resort y'inyenyeri eshanu iri hafi ya Takamaka Beach na Anse Soleil Beach, aho ushobora kugera ukoresheje iminota 15

Ikirwa cyiswe "La Digue'' kibereye ijisho ndetse kizihira abagisura

Mu Kirwa 'La Digue' usanga ahantu hose hahehereye kubera akayaga kava ku mazi n'ibiti bikikije ibice byinshi

Mango House | A LXR Hotel yubatse neza ku nkombe z'amazi mu Majyepfo y'Ikirwa cya Mahé

Ku gasongero ka Pariki Nkuru y'Igihugu muri Seychelles hagendwa na ba mukerarugendo

Pariki y’Igihugu ya Morne Seychellois ibarizwa mu Kirwa cya Mahé

Iyi pariki yatangijwe mu 1979, ni yo nini muri Seychelles ndetse ingana na 20% by'ubuso bw'Ikirwa cya Mahé

Abayisilamu na bo bafite aho basengera 'Allah' mu musigiti

Muri Seychelles, haboneka ubwoko bw'inyoni zisaga 250 z'ibyiciro bitandukanye

Inyubako ikoreramo Isomero Rikuru ry'Igihugu muri Seychelles

National Museum of History iri hagati mu Mujyi wa Victoria

Hotel zo mu Kirwa cya North Island zigezweho kandi zakira abanyacyubahiro batandukanye

Petite Anse 'Beach' ni hamwe mu hantu haryohera abahasohokera

Seychelles ifite ahantu henshi hari umucanga wegereye ku mazi aho abantu bashobora kuruhukira bisanzuye

Ingoro Ndangamurage ikungahaye ku mateka ya Seychelles

Seychelles ni igihugu giherereye hagati mu mazi

Itorero rya Anglican muri Seychelles rikorera muri St Paul Cathedral

Six Senses Zil Pasyon ni hoteli iri ku Kirwa cya Félicité

Story Hotel Resort iri ahazwi nka 'Beau Vallon Beach'

Usuye ubwiza bwa Seychelles araharuhukira

Escale Resort Marina & Spa iri mu Kirwa cya Mahé, ni mu bilometero 1,7 ugana mu Kirwa cya Anse Bernik

Kubera amazi magari, muri Seychelles haboneka ubwoko butandukanye bw'inyamaswa zirimo n'izo mu mazi

Utunyamasyo tuboneka mu Birwa bya Curieuse n'icya Cousin kibarizwamo inyoni nyinshi

Muri Seychelles haboneka utunyamasyo dusigaye hake ku Isi

Vallée de Mai Nature Reserve ni pariki ibungabunga ibidukikije iri mu Kirwa cya Praslin. Iri mu Murage w'Isi wa UNESCO

Abasura iki gihugu bafite ahantu bashobora gusura no guhahira mu masoko atandukanye

Sir Selwyn Clarke ni rimwe mu masoko akomeye muri Seychelles

Ifi iri mu biribwa bihabwa umwihariko mu batuye n'abagenda muri iki gihugu

Umujyi wa Victoria iherereye ku Kirwa cya Mahé

Kempinski Seychelles Resort ifite piscine igezweho

Kempinski Seychelles Resort ni imwe muri hoteli nziza ziri ku Kirwa cya Mahé. Ifite ahantu abayisura bashobora gukorera 'yoga'

Ikibuga Mpuzamahanga cy'Indege cya Seychelles cyafunguye imiryango mu 1971