Women in Business Awards ni ibihembo ngarukamwaka bitangwa kuri ba rwiyemezamirimo, abakozi,abayobozi b’ibigo b’abagore ndetse n’imiryango, ibigo cyangwa sosiyete bakoramo.

Sosiyete ya 1000 Hills Events ni yo ibitegura ikanabitanga. Iyi ni inshuro ya mbere bitanzwe kuko mu 2020 byarasubitswe kubera icyorezo cya Covid-19.

Ababihatanira bahabwa amahirwe hashingiwe ku mpinduka ibikorwa byabo byagize ku mibereho myiza y’abaturage mu nzego enye zirimo ubuzima, ubuhinzi, inganda ndetse n’uburezi.

Bigamije kurwanya ubusumbane hagati y’abagore n’abagabo mu mishinga ifatika no kongerera ubushobozi abagore mu Rwanda.

Binafite intego yo kongera umubare w’abagore mu mishinga ifatika no mu rwego rw’abikorera.

Ibyo mu 2021 byatanzwe mu byiciro bitandukanye birimo abantu ku giti cyabo n’ibigo.

Mu cyiciro cyahataniragamo ibigo by’imari byafashije umugore kwiteza imbere mu 2021 mu Rwanda, COPEDU Plc ni yo yegukanye igihembo.

Umuyobozi Mukuru wa COPEDU Plc, Muyango Raïssa, yatangaje ko serivisi nziza icyo kigo gitanga n’intego zacyo zirimo kuba icyitegererezo ari byo bakesha icyo gihembo.

Ati “Iki gihembo tugikesha serivisi nziza duha abatugana by’umwihariko abagore bakora imirimo y’ubucuruzi bifuza kwagura ubucuruzi bwabo, ari nacyo cyerekezo cya Copedu Plc. Dufite n’intego yo kuba Ikigo cy’imari cy’abagore cy’icyitegererezo ku rwego rwa Afurika.”

Nyuma yo kwakira igihembo, ubuyobozi bwa COPEDU Plc bwiyemeje ko mu mwaka utaha imbaraga zizakomeza gushyirwa mu kwegera abakiliya no kwagura serivisi z’ikoranabuhanga nka Mobile Banking; izabafasha kwakira no kohereza amafaranga mu zindi banki bakanishyura serivisi bakenera umunsi ku munsi biboroheye.

Muyango yashimiye abagana COPEDU Plc batacitse intege n’ubwo ingaruka z’icyorezo zari zitoroshye ndetse na 1000 Hills Events yateguye ibyo bihembo.

COPEDU Plc yashimiwe gufasha umugore kwiteza imbere mu 2021

Umuyobozi Mukuru wa COPEDU Plc, Muyango Raïssa, yatangaje ko serivisi nziza icyo kigo gitanga n’intego zacyo zirimo kuba icyitegererezo ari byo bakesha igihembo

COPEDU Plc yafashije abagore kwiteza imbere binyuze mu kubaha inguzanyo mu buryo bworoshye

Abayobozi ba COPEDU Plc bari bitabiriye umuhango wo gutanga ibihembo bya Women in Business Awards 2021

Abayobozi ba COPEDU Plc ubwo bari bamaze gushyikirizwa igihembo